今朝世盃外圍賽洲際附加賽爆發首回合，大洋洲代表新西蘭主場迎戰南美「5哥」秘魯。新西蘭一向只係於大洋洲做山寨王，實力屬有限公司，不過，秘魯有王牌荷西古里路誤用止痕藥，搞到藥檢肥佬要坐波監，令攻力受削，客場出擊都係穩陣行先，半場和值博。
（無綫myTV SUPER 302周六早上11時15分直播）
自從澳洲「轉投」亞洲後，新西蘭便成為大洋洲山寨王，但佢哋只限喺洲內蝦蝦霸霸，陣中只得效力般尼嘅前鋒基斯活特比較出名，完全出唔到大場面，從年中洲際盃連輸畀俄羅斯、墨西哥、葡萄牙，實力之差可見一斑。照道理秘魯應該可搭上世盃尾班車，點知佢哋嘅隊長荷西古里路好衰唔衰，早前因用一隻抗組織胺嘅止痕藥，之後世盃外對阿根廷嘅賽後藥檢肥佬，今個月被臨時停賽30日，即係話附加賽兩回合都唔使預佢，由於秘魯不嬲靠呢位前拜仁前鋒數胡，冇咗佢真係火力大減，單靠另一老將法芬難撐大局，今仗客場出擊唔會亂嚟，加上近5仗世盃外全開半場和，證明佢哋初段先求唔輸，造訪死守嘅新西蘭，初段似係悶鬥悶格局，一於再追半場和。