作客高手 技勝一籌
世界盃外圍賽歐洲區附加賽，首回合不分勝負嘅愛爾蘭同丹麥，周三凌晨次回合將會移師都柏林愛爾蘭主場一決雌雄。愛爾蘭首回合喺哥本哈根已經向對手丹麥展示過球隊鐵血防線嘅威力，不過想晉級冇可能齋靠防守，愛爾蘭呢場肯定會踢得更進取，變相削弱防守畀機會丹麥乘機發難，丹麥作客醒神，世盃外分組賽近3作客全勝，呢場平手盤捧丹麥好過。
（有線61及201台周三凌晨3時45分直播）
愛爾蘭唔泊大巴冇運行
首回合愛爾蘭作客丹麥完美演繹「泊大巴」戰術，球隊大部分時間退守喺自己半場之餘，好幾次就算攞到個波都係直接大腳清走，犧牲進攻機會嘅愛爾蘭全力專注防守效果當然顯著，尤其係門將戴倫蘭杜夫幾次精彩撲救都令對手無功而還，難怪賽後一班丹麥球員嗰嗰乸晒口面，慨嘆愛爾蘭踢得太保守搞到佢哋冇啖好食。不過呢場愛爾蘭為晉級肯定冇可能一味龜縮後防，領隊奧尼爾應該會換上大衞美拿同沙恩朗，務求踢出更有效嘅反擊攻勢，不過愛爾蘭不嬲攻力欠奉，小組賽入得12球，係附加賽各支隊伍中入球數最少，加上進攻球員技術有限，如果分心進攻，反而有可能畀丹麥偷雞，可見出線形勢並不樂觀。
丹麥作客3連勝兼入波先
丹麥上仗大部分時間都控球在腳，兼創造出多次絕佳入波機會，可惜只差臨門一腳，呢場佢哋只要入到波，就可以贏得作客入球優勢，球隊世盃外分組賽客戰近3仗全勝之餘，仲場場取得首個入球，經過首回合睇通愛爾蘭虛實，今場作客只要耐心組織攻勢，運用球員技術上嘅明顯優勢，晉級世界盃決賽周絕對不是夢，平手盤都係捧番丹麥。