周六深夜上演嘅世界盃非洲區外圍賽第3圈C組榜首大戰，由科特迪瓦主場對摩洛哥。家陣摩洛哥喺小組以9分排榜首，1分之差壓住「象國」，換句話講佢哋今場和波就可以出線決賽周，為咗實現呢個等咗32年嘅夢想，摩洛哥今場一定死守到完場。考慮到摩洛哥之前踢咗5場都未失過波，防守力勁爆，今場博入球細應該冇衰！
（無綫myTV SUPER 302周日凌晨1時30分直播）
作客和科特迪瓦都掂
摩洛哥對上一次打入世盃決賽周，已經係86年墨西哥世盃嘅事，依家佢哋距離再闖決賽周就只差一步，唔通今鋪仲會同你立亂對攻咩！再講，摩洛哥喺今次分組賽一直表現出色，5戰得2勝3和未輸過之餘，攻入9球而未有失波，防線堅係滴水不漏，試問科特迪瓦憑乜攻入佢哋先？冇錯，「大象國」今場係非勝不可，一定會開波就狂攻，不過佢哋都唔係冇後顧之憂，皆因佢哋防線重心艾歷拜利今場要停賽。到時科特迪瓦顧得前就顧唔到後，點會踢得好？再睇埋兩軍近5次交手「總入球」全部都係兩球或以下，今場博細啱晒數啦！