今晚歐霸分組賽第4輪連場好戲，其中最矚目之役，非H組榜首嘅阿仙奴主場硬撼貝爾格萊德紅星莫屬。阿仙奴老帥雲格揚言要喺畀人趕走前，再攞1次英超錦標，嚟緊周日仲有對曼城嘅大戰，今仗勢必盡出後備及新仔留力喇，況且出線在望你急佢唔急，轉捧中位數2.5球細盤好過。
（Now 633周五凌晨4時05分直播）
阿仙奴自2004年不敗封王後未嘗聯賽錦標滋味，近年成日將前4等於冠軍掛喺口邊嘅老帥雲格，成為球迷狂插對象，近日「雲爺爺」話佢比以往有更強烈嘅飢渴感，希望喺畀人趕走前再捧英超冠軍。查實阿仙奴依家落後榜首曼城9分，咁蹺嚟緊周日會喺聯賽正面交鋒，絕對係拉近差距嘅最佳時機，重要性遠勝今仗，留力唔奇。
阿仙奴今屆周中keep住有英聯盃同歐霸踢，雲格已狂用後備如基奧特、禾確特、韋舒亞，以及利尼斯、尼爾遜同尼基泰亞等新仔，等佢哋保持狀態兼吸取經驗，當然實力始終差啲。睇番H組形勢，阿仙奴頭3仗贏晒一枝獨秀，領先巴迪及貝爾格萊德紅星5分，只要今仗打和，則好大機會鎖定頭2名出線席位，使乜同你急呢？而且阿仙奴近5仗主場出擊，有4次開2球或以下，撞正有米蘭洛迪坐波監、有心無力嘅紅星，唔慌多波入，一於捧細盤。