今晚歐聯分組賽續有好戲上演，H組熱刺將會返主場再鬥「銀河艦隊」皇家馬德里，皇馬王牌C朗拿度腳風麻麻慘變「冇牙老虎」，咁搞法想入波都難，讓球主客和主隊熱刺受讓一球，唔使諗捧1.72倍讓球主勝！
（有線61、201台及有線流動版周四凌晨3時45分直播）
皇馬上季擸晒西甲同歐聯，勁到冇朋友，不過唔知係唔係咁搞到冇晒爭勝動力，今季表現極度飄忽，上仗西甲作客對住首次升班嘅基羅納，竟然爆冷輸1比2，王牌C朗繼續啞火冇波入，表現勁曳，依家喺聯賽畀死敵巴塞隆拿拋甩8分之多，睇番西甲歷史，從未有球隊試過落後8分下，可以後上贏得西甲冠軍，單睇呢項數據，皇馬已經可以話係衞冕失敗。
兩隊拋甩多蒙特 和波冇壞
好在「銀河艦隊」喺歐聯保持應有水準，小組賽3輪過後與熱刺同得7分並排榜首，以6分拋離第3位嘅多蒙特，今場打和大家攞1分，對兩邊都冇壞。皇馬今仗有多位主力倦勤，傷兵包括倒戈嘅「大聖爺」加里夫巴利、後衞華拉尼同門將基羅拿華斯，最慘係之前提過C朗腳頭無靈，單靠艾斯高及賓施馬等戰將未必咬得入熱刺。
熱刺今仗亦有射手哈利卡尼上陣成疑，冇咗佢熱刺攻力即時跌Watt，不過球隊已經破咗主場「溫布萊魔咒」，早前喺呢度大炒利物浦4比1就係最佳例子，熱刺今仗想贏可能有啲難度，但要守和問題不大，1.72倍讓球主勝咪走寶！