國際賽檔期之後，歐洲各大聯賽重開，德甲今晚上演史特加主場對多蒙特，「蜜蜂兵團」多蒙特成績急插水，近4場聯賽只有1和3負，射手奧巴美揚死火，防線更加大崩潰，近4場德甲竟然失咗12球，情況惡劣。史特加今季聯賽主場仍不敗，絕對唔嘢小，有得受讓，捧讓球主勝。（Now 670、FOX Sports、有線61及201台周六凌晨3時30分直播）
教練熟晒多蒙特路
多蒙特季初係威係勢，一度盤據榜首，但自上月中不敵ＲＢ萊比錫後，表現急轉直下，包括聯賽及盃賽，近7仗竟然只能夠喺德國盃贏過低組別球隊馬格德堡。「蜜蜂兵團」靈魂人物奧巴美揚腳風極之唔順，近3場聯賽及近2場歐聯都冇波入，呢支「蜜蜂尾後針」失靈，自然惡唔出樣。
另一邊廂，史特加今季重返德甲，靠晒主場搵食，5場聯賽主場取得4勝1和，同拜仁慕尼黑、ＲＢ萊比錫睇齊。史特加最犀利係呢5場主場只失1球，仲叻過拜仁，以多蒙特近期頹勢，更加難以攻破史特加防線。值得一提，史特加教練禾夫曾於2010至16年執教多蒙特青年軍，非常熟悉「蜜蜂兵團」內部情況，今場攞分機會甚高。