今日晏晝場日乙名古屋鯨魚主場對千葉市原，表面睇兩隊爭升班冇得唔搏，但其實喺呢場「佐藤家內訌」，鯨魚贏唔到都冇壞，反而市原就要搶得1分得1分，心態完全唔同，鯨魚要讓平半，梗係博市原1.95倍下盤啦！
（周六下午1時開賽）
日乙依家剩番2輪，鯨魚以72分排第3，落後次席長崎成功丸2分，驟眼睇佢哋今場要贏先有望爬上第2位，攞到直升日職嘅資格，唔使踢3至6名升班附加賽咁麻煩。問題係長崎最後兩場只係對尾4嘅讚岐卡馬達馬尼，同埋篤定降班嘅群馬草津溫泉，你話佢哋會失分真係冇人信，所以穩入前4名嘅鯨魚，根本可以疊埋心水打附加賽。相反排第9嘅市原暫落後第6位嘅德島漩渦兩分，但煞科兩輪都係硬嘢，鬥完鯨魚跟手要撼目前同得62分嘅FC橫濱，想踢附加賽場場都要搏。
莊家調整賠率露手影
鯨魚唔只主場往績佔優，今日更有加比爾沙維亞、八反田康平兩個傷愈復出，中前場攻擊力提升，但市原轉打「4-1-4-1」陣式後豪取5連勝入13球，狀態拍得住7戰不敗嘅鯨魚，歐洲一啲早開盤嘅莊家，唔少都將鯨魚嘅主勝由最初1.9倍上調到2倍，就知有啲嘢。況且今場係鯨魚前鋒佐藤壽人，同市原鋒將佐藤勇人兩兄弟史上第2次「雙子對決」，早喺09年12月5日，細佬壽人帶領廣島三箭以4比1打爆阿哥勇人嘅京都不死鳥。今年3月11日市原贏鯨魚兩球場波，因為勇人坐冷板，「佐藤家內訌」續集冇上演到，今次壽人禮讓益番阿哥唔奇，反正鯨魚和波無壞，寧捧受讓嘅市原好過。