意大利齊心力「保」世盃夢！今晚世盃外歐洲區附加賽首回合上演焦點大戰，4屆盟主意大利會作客硬撼冤家瑞典，除力爭趕搭出線尾班車之外，亦關乎傳奇門神保方能否破紀錄第6度出戰世盃決賽周。一眾「藍精靈」為保方而戰鬥心必堅，加上近5次交手贏4次，格食格下有力先拔頭籌，客勝值博。
（有線61及201台周六凌晨3時45分直播）
意大利39歲老門神兼隊長保方早前表示，好大機會喺明年世盃決賽周後退役，如果成事將會破紀錄成為首位6次征戰決賽周嘅球員，不過意大利喺世盃外G組只得次名，搞到依家要同瑞典上演兩回合生死戰。生死關頭，意大利主帥雲杜拿亦重召西甲射手榜「2哥」、有9球進帳嘅前鋒施蒙尼沙薩，連同狀態大勇嘅恩莫比尼，火力毋庸置疑。
難忘04歐國盃「默契波」舊恨
瑞典喺世盃外A組力壓荷蘭拎到次席嘅附加賽資格，絕非泛泛之輩，細數兩軍恩怨，必定係2004年歐國盃分組賽，瑞典逼和意大利1比1，並於尾輪疑似「默契波」打和丹麥2比2攜手晉級，並將累積5分嘅意大利踢出局，今次狹路相逢，誓要新仇舊恨一朝了。
不過連同嗰次「世紀和波」，意大利踏入千禧年後5次同瑞典交鋒，錄得4勝1和嘅壓倒性優勢，包括上年歐國盃以1比0擊敗仍有伊巴謙莫域在陣嘅瑞典，明顯係格食格，況且上屆同樣喺附加賽飲恨嘅瑞典，有守將路斯迪坐波監，防守力受到削弱，實難擋意大利來犯，客勝有計。