11月對好多人嚟講冇乜特別意義，但對「兵工廠」阿仙奴嚟講，每年11月絕對係噩夢，因為自雲格接手以來，年年11月都特別難捱，國際賽前輸畀曼城可能只係開始，今晚北倫敦打吡主場鬥熱刺，隨時延續噩夢，平手盤捧熱刺。
（Now 621及LeSports周六晚8時30分直播）
「黑色11月」真係每隔1年就要提1次，自雲格96年接手阿仙奴以來，唔計首季佢中途上任，11月成績係特別差，聯賽平均每場只得1.58分，比起9、10月平均每場超過2分差得遠。咁啱阿仙奴今個月踢咗兩場波，聯賽同埋歐霸都贏唔到，睇嚟呢個定律今季依然適用。
近6交手兵工廠未威過
撇開呢個宿命論，阿仙奴季初表現確實好難令人滿意，尤其係對強隊嘅成績更係失望，除輸畀曼城外，季初亦曾慘吞利物浦4蛋，對住車仔亦只係互交白卷，可見佢哋大戰場合完全冇優勢。反觀熱刺近年就真係愈戰愈勇，由以往畀阿仙奴食住，到依家恰番阿仙奴轉頭。自普捷天奴接手熱刺以來，6次聯賽對阿仙奴從未輸過，取得2勝4和不敗佳績。
無可否認，熱刺近年嘅穩定性已大幅提高，其高位壓迫踢法往往令對手無所適從，而且作客表現有時更勝主場，今季5場聯賽作客贏咗4場，取得12個入球，成績仲好過主場，今場開平手盤已證明莊家對熱刺甚為忌諱。
哈利仔迪利阿里蓄銳攻堅
熱刺另一好消息係主將哈利卡尼同埋迪利阿里都喺早前嘅國際賽避戰，可以專心應付呢場打吡戰，今季狀態大勇嘅哈利卡尼已經喺各項賽事射入13球，而且佢堪稱兵工廠剋星，6次對阿仙奴射入6球，加上熱刺已提早喺歐聯出線，可謂無後顧之憂，今場可盡情砌兵工廠。