曼聯和波夠分拎首名
今晚歐聯A組賽事，「紅魔鬼」曼聯作客鬥瑞士巴素利。紅魔鬼今場和波即可穩奪小組首名，加上今季佢哋作客水準唔算穩定，讓波唔值博。相反巴素利仲有機會爭取出線，戰意及決心毋庸置疑，巴素利1.93倍嘅讓球主勝捧得過。
（有線64、203台及ICM有線流動版周四凌晨3時45分直播）
雙巴復出冇耐就住踢
目前A組形勢，曼聯4戰全勝得12分高踞榜首，數字上仲未肯定晉級，最少要喺餘下兩仗多取1分先確保16強資格，相信問題不大。曼聯上仗聯賽反勝紐卡素4比1，「雙巴」伊巴謙莫域及保羅普巴齊齊復出，考慮到兩人傷愈不久，為免觸傷舊患，就算落場都唔會搏得太盡。何況曼聯今季作客表現唔及主場咁穩定，喺國內聯賽近5仗作客只贏得1場，曾經輸過畀車路士同哈特斯菲爾德，既然今場和波都夠數，以主帥莫連奴向來機關算盡嘅性格，穩穩陣陣求1分絕對唔奇。
另邊廂，瑞士巴素利現時跟莫斯科中央陸軍同得6分，巴素利對賽成績較佳有些微優勢。不過由於中央陸軍今輪會喺主場對住4戰全敗、現排包尾嘅賓菲加，巴素利唔想出線形勢陷於被動，今仗自然搶得1分得1分。記得兩軍上次於歐聯分組賽同組，巴素利曾於主場以2比1殺敗曼聯，雖則雙方陣容今非昔比，但有歷史因素支持，對巴素利球員心理上有一定幫助，主場受讓絕對抵捧。