墨超進入季後賽階段，8強戰首回合上演「墨西哥城打吡」，藍十字先喺主場硬撼「神鵰」CF阿美利加。以聯賽第6名晉級嘅藍十字，今季喺聯賽同盃賽兩次面對CF阿美利加皆告輸波之餘，原來近7次交手未贏過兼有6次慘吞敗仗，完全畀CF阿美利加食住，今季藍十字雖然掹車邊入到季後賽，不過實力肯定次一皮，CF阿美利加可以睇高一線，客勝捧得過。
CF阿美利加恰慣對手
藍十字對上一次打入季後賽已經係2014嘅秋季聯賽，球隊近年表現低迷，多次無緣冠軍爭奪；雖然前西班牙教頭占美斯上年接掌教鞭後，球隊表現略有起色，今年春季聯賽仲成功打入闊別多年嘅季後賽，可惜呢位前西甲教練近日暗示有可能離隊，受消息影響球隊軍心肯定動搖，加上占美斯接掌藍十字後，3次面對CF阿美利加都輸晒，今場一班藍十字球員難有作為。
CF阿美利加自2014年取得春季聯賽冠軍後，今年將會再次衝擊冠軍寶座，球隊今季獲前墨西哥國家隊教頭米基爾靴里拉加盟接掌教鞭後，表現強勢高踞聯賽第3，球隊早前於墨西哥盃被對手以12碼淘汰，反而可以專心應戰季後賽。CF阿美利加各項賽事近4仗不敗，加上對藍十字往績上佔優，今場就算作客想贏波都唔算困難，客勝咪錯過。