招攬球星踢出名堂
依家搞波，畀更多人識得隊波係好重要，墨超前列常客堤格雷斯深明此道，近年不斷簽入外國強援，繼2015年羅致當時嘅法國國腳基格納，之後接連從德甲賀芬咸及英超韋斯咸，買入智利前鋒伊度亞度華加斯及厄瓜多爾射手安拿華倫西亞，立刻引來各地傳媒關注，大大加強球隊喺國際嘅知名度。
近年4闖季後賽2次封王
當然，如果冇好成績配合，個朵幾響都冇用，堤格雷斯已連續7個階段殺入常規賽前8而躋身季後賽，今季首階段以安拿華倫西亞為首嘅鋒線亦交足貨，令堤軍以28球榮膺墨超第2猛火球隊，極具冠軍相。
儘管堤格雷斯喺今季常規賽尾輪，以0比2不敵同州死敵蒙特雷屈居亞軍，不過佢哋一向擅踢季後賽，單計近3季6個階段，「老虎」4次殺入季後賽決賽兼兩度封王，係近年成績最佳嘅墨超球隊；咁啱得咁蹺，呢兩次奪標都係首階段，似乎同首階段冠軍特別有緣，絕對係「冠軍」首選。