亞冠盃今晚上演決賽次回合，日職代表浦和紅鑽主場再鬥沙特阿拉伯球隊希拉爾。首回合踢成1比1未分勝負，失咗個作客入球嘅希拉爾今仗一定要入波先有機會捧盃，不過紅鑽主場威力強勁，希拉爾焗攻隨時暴露更多空位，紅鑽小讓平半，1.88倍上盤捧得過。
（Now 672周六晚6時15分直播）
紅鑽首回合攞到個作客入球，今仗只要唔失波，便可憑作客入球優惠捧盃，驟眼睇紅鑽雖有少少優勢，但一日未完場任何事情都可以發生，紅鑽唔會刻意求和咁蠢。
紅鑽喺近兩屆亞冠盃一共踢咗10場主場比賽，取得9勝1和，包括今屆賽事6戰全勝。事實上紅鑽今屆由16強開始，連續3圈淘汰賽都係喺首回合作客和波或輸波嘅情況下，次回合返主場贏波晉級，今次有機會「照辦煮碗」封王。首回合嘅入波功臣拿菲爾達施華今屆亞冠盃所入8球，有5球喺主場取得，喺主場球迷面前腳風特別順，勢成客軍心腹大患。
希拉爾對東亞兵冇符
希拉爾今仗必需入波先有價講，不過球隊今屆6仗亞冠盃作客只有1仗冇失波，其餘5場加埋失咗10球，防線唔穩陣，焗攻恐怕令後防更空虛，加上希拉爾近5次喺亞冠盃面對東亞球隊只得2和3負成績，包括2014年決賽輸畀西悉尼流浪者屈居亞軍，睇怕今鋪難以翻身。