曼城阿仙奴不勝無歸

周日英超雙雄分途作客出擊，其中壓軸戰一哥曼城出征哈特斯菲爾德。曼城英超一路高歌猛進，12輪戰罷只係失過2分高踞榜首，鋒力旺盛，對手哈特斯菲爾德聯賽上仗面對攻力一般嘅般尼茅夫，都要慘吞4蛋如不設防，試問又如何抵擋得住曼城一班進攻好手？呢場曼城讓2球實在太仁慈，讓球客勝值博。
（Now 621台及LeSports周一凌晨零時直播）
藍月亮炒起哈特斯菲爾德
作為同城勁敵兼聯賽主要競爭者，莫連奴執教嘅曼聯喺聯賽苦苦追趕，都被曼城拋離成8分，寸王嘅踢法仲要被嫌太保守不得人心，畀曼聯名宿「奧脫福大帝」簡東拿奚落，相反曼城今季戰績彪炳之餘，仲踢得夠晒精彩畀睇波球迷過足癮，多得哥迪奧拿嘅地面滲透戰術，畀一班曼城進攻好手發揮到淋漓盡致，睇番聯賽射手榜前10位，有4名都係曼城球員就知佢哋幾入得波。「藍月亮」上場歐聯包括大衞施華、費蘭甸奴同利萊辛尼等主力齊齊抖到足，有望全力迎戰。對手哈特斯菲爾德今季主場就曾經畀熱刺大炒4蛋，聯賽上仗再以同樣比數大敗畀般尼茅夫，可見球隊實力有限，上季喺足總盃仲試過1比5遭曼城血洗，呢場讓球客勝係不二之選。
兵工廠作客般尼吼讓球和
另一支英超勁旅阿仙奴喺較早時間先作客般尼。「兵工廠」歐霸早早出線，一班主力上仗作客科隆齊齊有得抖，不過今季英超客戰表現實在令人不敢恭維，作客至今贏得1場仲輸咗4仗，呢場「兵工廠」牌面上雖然有優勢，不過面對主場夠硬淨，兼有神奇教頭戴治領軍嘅般尼，阿仙奴唔似有本錢大勝，兩隊近4次交手阿仙奴係就係贏晒，不過都只係以1球之差小勝，呢場「兵工廠」再次讓1球，當然追捧讓球和。
（Now 622台及LeSports周日晚上10時直播）