睇咗5輪歐聯分組賽及「三色台」直播法甲，筆者對踏入巔峰期嘅豪門巴黎聖日耳門（PSG）更加了解，佢哋喺多條戰線都表現得所向披靡，殺入歐聯決賽甚至捧盃嘅機會都高唱入雲，何解？
歐冠（歐聯前身）自1955年成立後，除咗1993年馬賽不名譽下奪冠外（馬賽在法甲因行賄華倫西恩斯獲勝而被判降班），未有其他法甲球隊能登上歐洲之巔，因此飢渴感極強。正如車路士班主阿布拉莫域以往一擲千金，最終目標係捧走歐聯，PSG近年不惜工本，都係想勇奪呢項歐洲球會級最高殊榮，而且佢哋坐擁全歐最強3叉戟，巴西球星尼馬天價來投，讓PSG嘅進攻全面升呢，另一新兵基利安麥巴比靈活多變嘅打法，常與尼馬移形換影嘅走位，令對方防不勝防，同時令箭頭卡雲尼重拾信心，火力之強非常恐怖。
同時，歐洲其他勁旅都有自身問題而走下坡，連續兩屆盟主皇馬今季表現不穩，巴塞失去尼馬後，進攻不及以往銳利，拜仁經過季初動蕩後，雖有老帥軒歷基斯出山穩住大局，但論實力難與佢喺2013年帶隊贏3冠王相提並論，環顧整個歐洲，除咗如日方中嘅曼城之外，能與PSG匹敵嘅球隊少之又少。況且PSG喺法甲就算半力出擊都冇敵手，與曼城、皇馬、巴塞於國內要打生打死相比，明顯佔優，集萬千有利條件於一身，PSG絕對有機稱霸歐洲。至於PSG喺周一凌晨法甲作客大戰死敵摩納哥，相信能輕鬆取勝，但賠率乏味都係睇波算數。
（my TV SUPER 303周一凌晨4時直播）