快車期要識玩留放
今晚英超快車屈福特主場迎擊曼聯。莫連奴接掌曼聯第2季，一洗「紅魔」過去幾季頹風，成績尚算滿意，但佢保守嘅踢法未改過，曼聯近6次客戰有4次同對手半場打和，快車檔期更加唔慌會急住進攻，免得班兵踢殘；屈福特喺主帥馬高施華領軍下踢出「燒鵝味道」，絕對有力守到半場，2.25倍半和抵玩！
（Now 621及LeSports周三凌晨4時直播)
紅魔鋒將啞晒火
莫連奴「泊大巴」用得叻就係人都知，不過要佢教班波踢進攻足球就考起佢，「寸王」近日仲因為咁畀人寸返轉頭，名宿簡東拿就嫌曼聯踢法唔好睇。曼聯近期雖有伊巴謙莫域同保羅普巴齊齊復出，以為班波會轉性踢出漂亮足球，點知事與願違，上周六英超喺主場，只係靠對手一個烏龍波1比0僅勝新升班嘅白禮頓，表現唔出勁旅本色，再加埋前仗喺歐聯0比1輸畀巴素利，曼聯已經連續兩仗冇自己友入過波，攻力認真曳，前鋒盧卡古近10場比賽入得1粒啞晒火，加上寸王深明快車檔期留放之重要性，今晚對住屈福特唔似半場就嚟搶。
「大黃蜂」攻守兼備
「大黃蜂」屈福特上仗3比0完勝紐卡素，兩連勝之餘更係一球不失，可謂攻守兼備。球隊今季以3比3逼和利物浦同2比1贏阿仙奴堪稱代表性，對住英超Big 6毫不怯場，今仗更有隊長迪尼坐完波監復出，面對牌面佔優嘅紅魔，肯定以穩守戰術應戰，領隊馬高施華屬有料之人，半場要守住鋒力疲乏嘅曼聯唔難，半場和值博。