紅藍大戰例牌反客為主
今晚英超上演紅藍大戰，「紅軍」利物浦主場迎戰「藍戰士」車路士。兩隊可以話歡喜冤家，每次交手均鬥得異常燦爛，而且有一個共通點，就係主場一方極難贏波，過往16次交手，主場1隊僅贏2次，可以話全無主場優勢可言，利物浦今仗讓唔起平半，樂比撐車仔下盤。
（now 621及 LeSports周日凌晨1時30分直播）
其實利物浦同車路士都係主場成績相當好嘅球隊，但唔知點解每次交手主隊都佔唔到甜頭，唔計中立場賽事，16次對賽和波就出現多達7次，另外作客一隊亦贏過7次，兩隊每次交手都大戰氣氛濃厚，好似決賽咁踢，絕對係BIG6對賽之中，戰況最激烈、最緊湊嘅戲碼，或者兩隊都屬於遇強愈強球隊，故每次交鋒都各不相讓，從博彩角度而言，邊隊讓波捧對家就啱數。
當然，以上呢個只係大方向，雖然命中率高，但都要深入分析吓兩隊近況。聯賽3連勝嘅利物浦狀態唔錯，3場波入咗10球，導致今場賠率偏熱，不過周中對西維爾領先3球下被追和，士氣點都有啲影響，亦暴露出防線不穩嘅老毛病。
樂比不厭其煩講過好多次，利物浦門將無論係米洛列特或卡利奧斯，中堅「兩舊雲」洛夫雲或卡拉雲，都唔係踢頂級球會嘅料子，今季對住熱刺、曼城輸4、5球，防線絕對係責無旁貸，唯一好消息係祖爾麥迪比傷愈，或者會幫到少少。
車仔雖然周中歐聯遲1日踢，仲要老遠飛去阿塞拜疆，但由於贏波過程實在太輕鬆，尼高路簡迪、夏薩特同埋馬高斯阿朗素3名主將早早退下火線，首席射手艾華路莫拉達亦只擔任後備，留力應付今場硬仗，故車仔喺體力上可能反而更有優勢。
今場嘅「X-Factor」一定係倒戈嘅穆罕默德沙拿，佢過往喺車仔冇乜機會，但今季卻喺利物浦大爆發，所以夏薩特都好醒目，賽前向佢大笠高帽先，等佢條氣順番唔會爆得咁勁，只要車仔搞得掂佢，今場反客為主絕對唔奇。