基達菲受讓過關佳品

周一悶悶哋唔使驚，等我阿King醒番啲激筍貼士畀大家。西甲壓軸戰，愛斯賓奴主場面對基達菲，基達菲客戰表現唔失禮，加上球隊近期聯賽表現上力，作客愛斯賓奴偷雞話咁易，受讓肯定揀讓球客勝。仲有莫斯科斯巴達大盤同沙蘭迪兵工廠細盤，3串1過關有5.03倍博得過。
今季西甲新升班嘅幾支球隊都幾爭氣，表現夠醒神，呢場作客嘅基達菲就係其中之一，球隊聯賽近3仗不敗之餘，仲贏咗2場，上仗更大勝艾拉維斯4比1，全隊士氣處於高峰，尤其多得前鋒安祖路爾斯呢排夠晒弗，近3仗入3球，效率有番咁上下。反觀愛斯賓奴上仗賠了夫人又折兵，聯賽慘吞2蛋輸波之餘，仲整傷埋主力前鋒巴迪斯達奧，今仗冇本錢讓波，捧讓球客勝好過。
（Now 632周二凌晨4時直播）
串斯巴達大沙蘭迪細
另外仲有場俄超大戰，莫斯科斯巴達主場面對辛尼特，莫斯科斯巴達踢法進取聯賽近3仗全開4球或以上，首循環交手畀辛尼特大炒1比5，呢場再演入球騷唔出奇；最後阿甲沙蘭迪兵工廠近4仗主場全開2球或以下，今場喺番主場面對同樣入球乏力嘅泰拿尼斯，唔似會多波入，捧細盤。