打落水狗誓演復仇戰
今晚歐聯焦點大戰，肯定係D組祖雲達斯主場硬撼巴塞隆拿。祖雲達斯近期士氣低迷，一眾意大利國腳仲未走出世盃出局嘅陰霾；相反巴塞除主將美斯Keep住保持上佳演出外，其他綠葉球員都弗到爆，今仗趁住「老婦人」元氣未恢復，有望報番上屆歐聯8強作客慘吞3蛋兼被淘汰之仇，巴塞小讓平半必捧2.08倍上盤！
（有線61、201台及ICM有線流動版周四凌晨3時45分直播）
巴塞暫時以10分高踞D組榜首，呢場打和就可確保首名出線，而以7分緊隨其後嘅祖雲達斯，暫以3分領先排第3嘅士砵亭，祖記自然想贏波保住優勢，若然不幸輸波，隨時會畀士砵亭追到同分，邊隊出線就要睇埋最後一輪。不過巴塞今屆歐聯作客未輸過，祖記莫講話贏，連頂住巴塞猛攻都唔容易。
祖記國腳未擺脫世盃傷痛
意大利國家隊啱啱喺世盃歐洲區附加賽畀瑞典淘汰，近60年嚟首次缺席決賽周，「老婦人」多位主力包括門將保方，都係國家隊嘅中堅分子，球隊氣氛畀呢個「出局噩夢」所牽動在所難免，絕對影響埋場上表現，上仗聯賽就以2比3輸畀森多利亞，今仗面對實力更強嘅巴塞，就算有主場之利，睇怕都有麻煩。
巴塞今季向球迷成功證明班波唔只係得美斯一人獨大，除咗多次屢建奇功，證明自己絕非水貨嘅荷西保連奴之外，上仗聯賽蘇亞雷斯都一洗季初頹風梅開二度，信心返晒嚟，就連少有機會嘅柏高艾卡沙，前仗面對西維爾都省兩粒，一眾進攻好手嗰嗰都咁弗，值得一提首循環巴塞主場炒祖記3蛋，美斯打破宿命兩度射破保方大門，今晚對住仲未走出陰霾嘅「老婦人」，必把握機會報番上屆被淘汰出局之仇，巴塞小讓平半，上盤絕對唔好錯過。