墨爾本城有力洗頹風

今周澳職攤開嚟踢，尋日、今日同星期日都係每日1場獨腳戲，只得周末晏晝係有雙響炮，兩場打孖上。講番今日墨爾本城主場迎戰珀斯光輝，主隊近期狀態回落，如果想攞聯賽冠軍，數字上不容有失喇！至於珀斯光輝，今日有好幾個傷兵缺陣，加上要遠程作客，相信都要擺低3分嘞。
（有線64、203及無綫myTV SUPER 303周五下午4時50分直播）
墨爾本城今季開咧原本順風順水，頭4場贏晒，可惜自從榜首大戰輸畀FC悉尼之後，成隊好似元氣大傷，狀態同士氣插水式下滑，唔經唔覺原來有3場贏唔到！原本佢哋條防線都算穩定，點知出現極大漏洞，近3場都有失波，同榜首紐卡素噴射機已經有成4分差距，唔可以再有咩閃失喇！講番今日嘅人腳，中前場終於比較齊章，有番羅斯麥哥馬克同埋「澳洲國寶」卡希爾復出，班底雄厚，返主場踢有力一洗頹風！
珀斯光輝殘陣厄運難逃
反觀作客嘅珀斯光輝今季依舊冇乜資源幫球隊補充實力，今季成績唔多理想係喺預計當中，作客就更加係球隊嘅盲門，4場輸咗3場！最弊係今日陣中仲有一大堆傷兵：祖爾捷安尼斯、馬斯禾倫、史葛利維利，甚至兩大中前場進攻主力，阿當泰加特同迪亞高卡斯度都缺陣，顯見兵源極度不足。上場唔夠人，於是就連16歲嘅「牛奶仔」都要派埋出嚟踢正選！慘況未見改善，仲要長途跋涉作客，睇嚟珀斯今日都係厄運難逃！