榜首對決贏波即出線
歐聯嚟到第5輪分組賽，「死亡E組」今晚爆榜首大戰，由西維爾主場對利物浦，今場贏波一方即可提早出線，雙方肯定豁出去鬥攻。事實上，西維爾同利物浦無論近期成績，或者過去交鋒紀錄，都勁旺入波，兩支擅於進攻嘅球隊對壘，戰況往往千變萬化，最好揀中位數2.5球嘅1.57倍入球大。
（有線61、201台及ICM有線流動版周三凌晨3時45分直播）
E組兩個出線席位，屬於利物浦、西維爾同莫斯科斯巴達之爭，現時利記以8分排榜首，西維爾落後1分，莫斯科斯巴達5分排第3。由於利記最後1輪鬥莫斯科斯巴達，所以西維爾今場只要全取3分，就肯定可以穩佔前兩位出線。西維爾主場表現非常好，近7次主場出擊全勝，包括歐聯大勝馬里博爾3比0，同埋贏莫斯科斯巴達2比1。唔好忘記，西維爾分組賽首循環作客利物浦，都可以打和2比2，基於贏波就出到線嘅誘因，西維爾今場肯定更加主動進攻。
近兩對碰均大手交易
榜首利物浦今場贏波，亦可拉開至4分距離，意味提早1輪晉級16強。「紅軍」近期總算擺脫「海鮮味」，近6仗比賽贏咗5場，合轟21球，平均每場入超過3球。「古埃及文明」進攻組合火力全開，特別係穆罕默德沙拿腳風極順，近3場省5粒，首循環對西維爾亦有1球進帳，難怪近日傳出連皇馬都想收購呢位「埃及美斯」，今次「征西」正好趁機騷吓哥利。
兩隊喺2016年歐霸盃決賽同今屆歐聯，兩次交鋒總入球都係4球，中位數2.5球嘅入球大1.57倍固然屬穩陣之選，進取啲嘅甚至可博埋2.5倍嘅中位數3.5球大盤，隨時兩個盤都贏晒。