米高倒戈皇馬泊大巴
今晚西甲「銀河艦隊」皇馬主場對尾3嘅馬拉加，皇馬剛在歐聯大勝一場，但佢哋喺聯賽表現總係跌Watt，淨係王牌C朗至今聯賽入得1粒就知喇，況且馬拉加主帥兼皇馬名宿米高講到明會泊大巴，前線死火嘅「銀河艦隊」難大炒，轉捧中位數3.5球嘅2.6倍細盤更划算。
（ViuTV 96台及Now 632周六晚11時15分直播）
BBC組合入球數字低迷
皇馬喺周中歐聯大勝尼科西亞6比0，以次名打入16強淘汰賽，該仗省兩粒嘅王牌C朗亦以18球，創下自己同歐聯史上年度入球紀錄新高，不過佢返到聯賽變咗「軟腳朗」，開季至今呢位葡萄牙隊長入得1粒咁大把，完全唔掂檔，佢拍檔賓施馬更加係「機會終結者」，經常門前失機，連埋養緊傷嘅加里夫巴利，昔日名震球壇嘅「BBC」組合今季聯賽夾埋入得4球，真係差強人意，難怪「銀河艦隊」不斷失分畀弱旅、暫時西甲只排第3，今仗更有隊長中堅沙治奧拉莫斯因傷倦勤，有後顧之憂下未必谷得太上。
皇馬近8仗聯賽冇火
另一邊廂，馬拉加雖位列尾3，但上仗反勝拉科3比2令士氣大振，主帥米高係皇馬一代名將，對母會瞭若指掌，佢賽前話今仗或會起用迪亞高普蘭高，及改踢5人防線，實行喺巴拿貝球場泊大巴搶分，佢哋今季對巴塞、西維爾及維拉利爾等前列分子，場均只失兩球，證明防線頂得兩嘴，加上皇馬近8仗聯賽全開3球或以下，似乎冇咩計仔破密集，今晚就算贏都唔慌多波入，3.5球嘅細盤乃不二之選。