今日係澳洲足總盃決賽嘅大日子，呢項係當地嘅足球盛事，今屆由FC悉尼同阿德萊德聯爭冠軍。論近況，兩隊不相伯仲，但FC悉尼今場人腳完整，加上呢場坐擁主場之利，相信法定時間90分鐘內有能力解決阿德萊德聯捧盃，FC悉尼讓半一都要上盤！
（有線64及203台周二下午4時30分直播）
FC悉尼上一場聯賽喺回飛之下，擊落當時聯賽榜首紐卡素噴射機！雖然之前小弟成日強調FC悉尼呢班波今季有啲陰陽怪氣，對親下游球隊就有啲「蠱惑味」，之但係佢哋每鬥強隊都態度認真，已經先後擊敗墨爾本城同紐卡素噴射機，足以證明一碰強隊，就一定使出真功夫！因此今日同阿德萊德聯呢場爭標戰，唔使問，更加出盡全力去砌啦！
FC悉尼上場有右閘韋基舒亞休息、中場美亞斯祖斯基復出以後備落場，今場統統及時上陣，可望「夫添」出擊。佢哋上季主場都贏「阿聯」2比0，爭勝信心應該大過對方！
阿德萊德聯場場有失波
至於阿德萊德聯雖然上場澳職作客勝出，但始終對手中岸水手實力弱啲，唔足以同FC悉尼做對比。今季「阿聯」一遇強隊就現形，包括曾經主場輸畀噴射機同埋墨爾本城。陣容方面，進攻主力阿比沙路臣仲未復出，加上後防不穩，今季踢咗7場聯賽，場場都有失波，今日繼續作客，試問又點敢睇好呢！