另一場墨超季後賽8強首回合，利昂主場鬥常規賽亞軍堤格雷斯，今場堪稱射手大決鬥。雖然利昂喺常規賽僅排第7位，但前鋒保斯利表現搶鏡轟入11球，同蒙特雷前鋒阿維利斯靴達度並列神射手一哥。堤格雷斯擁有3位名牌神鋒基格納、伊度亞度華加斯及安拿華倫西亞，雙方有大把本錢駁火，首選入球大。
利昂入得又失得
利昂今季常規賽攻入27球，僅次於蒙特雷同堤格雷斯，皆因陣中有一對「進攻孖寶」保斯利同艾利斯靴南迪斯。阿根廷名將保斯利2013年加盟利昂後，上陣151次入89球，入球率非常高。中場艾利斯靴南迪斯今季亦入咗6球，火力十足。不過利昂防守弱，常規賽17戰失23球，屬於8支季後賽球隊之中失波最多嘅一隊，所以有12場總入球開出3球或以上。
堤格雷斯3位前鋒基格納、伊度亞度華加斯、安拿華倫西亞曾分別於法甲、德甲及英超搵食，級數有保證，3人今季常規賽總共入18球。值得一提，後衞安斯莫祖連奴都有3球進帳，堤格雷斯進攻點多元化，相信今仗作客都唔會縮。