「士哥王」停賽難破鐵桶
作為世盃外圍賽壓軸一戰，南美洲「5哥」秘魯聽朝主場迎戰大洋洲代表新西蘭，勝方將成為決賽周最後1隊入圍球隊。原本球迷一致睇好秘魯可淘汰「山寨王」新西蘭，但首回合前發生射手荷西古里路藥檢肥佬停賽事件，首回合悶和0比0證明秘魯鋒力大受打擊，今仗要破新西蘭死守唔易，中位數2.5球嘅細盤有1.95倍值得支持！
（周四早上10時15分開賽）
秘魯首回合作客雖然控制大局，但國家隊「士哥王」荷西古里路停賽，球隊似乎搵唔到入波板斧，11次埋門只得3次中框，被推前頂替荷西古里路嘅翼鋒法芬雖然經驗十足，但呢位33歲前鋒需要空間嚟發揮速度優勢，面對新西蘭屯重兵防守，根本冇發揮機會。
秘魯今仗回師主場仍受睇好，但阿根廷籍領隊加雷卡出名穩陣，如果畀新西蘭拎到作客入球，秘魯隨時會陷入萬劫不復之地，所以秘魯主攻之餘亦會先做好防守，只求把握好1次入波機會，小勝晉級就夠完成任務，唔好期待秘魯會瘋狂搶攻。
新西蘭決心「泊大巴」
新西蘭自知實力不足，今仗必定繼續「泊大巴」死守，以韋斯咸中堅雲斯頓列特為首嘅防線，喺首回合防守可以話係滴水不漏。新西蘭陣中最具卡士嘅前鋒基斯活特，首回合亦只係後備落場，可見佢哋死守決心非常堅定，秘魯要入波絕對唔易！