日職進入最後直路，剩餘3仗聯賽嘅川崎前鋒，周六下午將會喺主場鬥大阪飛腳。前鋒暫以7分落後多踢1仗嘅「一哥」鹿島鹿角，如果前鋒今仗對飛腳全失3分，鹿角便會宣布提早封王，因此前鋒今仗不容有失，球隊近4仗聯賽有3仗開4球或以上，加上有弗爆前鋒小林悠爭做神射手，呢場面對無欲無求嘅大阪飛腳，大勝話咁易，中位數3/3.5球，捧入球大穩陣。
（有線61、201及148台周六下午1時直播）
小林悠為神射手搏命
前鋒早前接連喺日皇盃8強及日聯盃決賽落敗，剩餘聯賽錦標可爭，主場出擊絕對會全力搶攻。球隊今季聯賽已入64球，與紅鑽並列入球最多隊伍，而且前鋒近10仗聯賽有9仗開3球或以上，近4仗甚至有3仗開到4球或以上，可見攻力有番咁上下，尤其係當家前鋒小林悠近4仗聯賽場場有波入，腳風順到冇朋友，喺聯賽射手榜都只係落後興梠慎三1粒咁大把，為爭聯賽射手頭銜肯定加倍肉緊，今場有望延續連場入波嘅好狀態。
相反對手大阪飛腳無緣爭踢亞冠盃之餘，同時都唔愁降班，餘下賽程成為例行公事，鬥心成疑，加上球隊聯賽作客近8仗都有失波，防線不穩之下，中位數3/3.5球入球大值得捧場。