殘陣頑抗墨城
今午澳職獨腳戲由榜尾布里斯班獅吼主場鬥墨爾本城。開咧未贏過嘅獅吼傷兵滿營，一班主將齊打柴，惟有搵後生仔頂硬上，今仗對住「2哥」墨城，獅吼冇得諗焗守搶分，捧中位數2.5球嘅細盤！
（有線64、203台及無綫myTV SUPER 303周五下午4時50分直播）
講到澳職唔可以唔提澳洲國家隊，皆因要恭喜佢哋喺世盃洲際附加賽淘汰洪都拉斯，成功打入明年決賽周，效力墨爾本城嘅卡希爾喺附加賽次回合雖然冇波入，不過作為領軍人物，肯定成為焦點。
墨城攻力麻麻
卡希爾喺「袋鼠軍團」成功晉級後語出驚人，話為咗操弗啲幫澳洲踢世界盃，唔排除會離開墨爾本城，以爭取更多上場機會。無論如何，呢位下個月就38歲嘅老將，為咗幫澳洲爭出線真係搏埋條老命，今日對獅吼嘅聯賽，佢就算出場都未必會踢足全場。墨爾本城雖位處前列，但本身攻力麻麻，入波數字唔算多，近7仗更有6場總入球開2球或以下，鋒力畀唔到人信心。
布里斯班獅吼今季開咧成績曳爆，踢咗6輪仲未開齋，加上當打主力幾乎傷晒，包括中場大將湯馬士基斯甸臣、主力守衞迪維利同丹尼爾保尼斯，頭都痕嘅領隊艾萊斯今場為求搶分，肯定會以穩守戰術抗敵，中位數2.5嘅細盤有1.95倍捧得過。