波蘭墨西哥歎細界
明年世界盃決賽周2支參賽勁旅波蘭同墨西哥，今晚會喺格但斯克拍跳，話就話係為世界盃備戰，不過2隊都唔想踢殘班主力球員，雙方王牌射手羅拔利雲度夫斯基同查維亞靴南迪斯，賽前不約而同受傷多數唔會上陣，大家齊齊就住踢之下，開入球細[2.5球]機會好大。
（myTV SUPER 302周二凌晨3時45分直播）
波蘭近年成績突出，好大程度係因為王牌射手羅拔利雲度夫斯基狀態大勇，波蘭喺世盃外分組賽入咗28球，當中有16個就係由「羅拔仔」攻入。今次國際賽期，「羅拔仔」因傷休戰，波蘭上仗即刻死火，同烏拉圭踢成0比0平手，而且波蘭對上3次友賽總入球都係2球或以下，同踢世盃外展現嘅強大火力完全唔同。
墨西哥啱啱同比利時踢友賽激戰踢成3比3，不過主力射手查維亞靴南迪斯喺該仗拉傷大腿，踢咗半場多啲就被迫退下火線，今仗極可能會缺陣，墨西哥冇咗「小豌豆」肯定鋒力大減，要攻破防守出色嘅波蘭唔容易，細盤好路！