法國U21搶首名有着洛
除咗世盃外圍賽附加賽之外，U21歐國盃外圍賽亦打得如火如荼，今晚有第9組榜首大戰，由「2哥」斯洛文尼亞U21主場硬撼「1哥」法國U21。「小高盧雞」為爭取首名直接出線資格，挾頭4仗全勝之勢，面對勁敵斯洛文尼亞U21唔會留手，上盤有計。
（周二凌晨1時45分開賽）
先講講第9組形勢，現時法國U21頭4仗贏晒位列榜首，領先同樣未輸過的斯洛文尼亞2分，由於小組首名會直接進身決賽周，因此今仗邊隊贏波，對爭取首名非常有利，戰意不用懷疑。不過「小高盧雞」頭4仗狂轟12球，氣勢如虹，單係斯特拉斯堡前鋒馬田泰利亞就有7球進帳，並有穆沙迪比利支援火力全開，等閒之輩好難頂得住，而斯洛文尼亞U21雖獲3勝1和，但唯一失分之役，就係畀弱旅盧森堡U21逼和1比1，實難擋法軍來襲，法國U21讓半一照要上盤。
希臘夠料恰「小格仔兵」
至於早少少開波嘅第1組賽事，希臘U21主場迎戰榜首「小格仔兵」克羅地亞U21，雙方同得12分，希軍隊長高洛里斯頭4仗攻入5粒，配合安德羅索斯及加蘭奴普路斯，不容小覷，相反效力愛華頓嘅「格仔兵」前鋒尼高拉華錫，臨時被大國腳徵召入伍，勢必令攻力大減，此消彼長之下，寧捧有地利嘅希臘主勝。（周一晚上10時30分開賽）