筆者由1949年，5歲開始睇波，當年流行「WM」陣式，有2位後衞、1位中堅、2位中衞（中場），呢5人負責防守，另外2位輔鋒、左右翼、前鋒負責進攻。直至1958年巴西出現1位全能中場迪迪，可以喺中場打晒，「WM」陣式變成「424」。1966年世界盃，英格蘭改良為「442」。上世紀70、80年代興起「433」，德國人則發明「352」陣式。
無論陣式點演化，都係一堆數字，最重要係睇主帥點樣根據手上人腳，採用最適合球隊嘅陣式。上季英超車路士領隊干地，手上擁有優秀側擊球員，包括兩位能瞻前顧後嘅翼衞馬高斯阿朗素及域陀摩西斯，加上好防中尼高路簡迪、同今季已轉投曼聯嘅尼曼查馬迪，因而制定343陣式，最終成功於英超稱霸。
「4231」守得又易用
今季曼聯、曼城、利物浦及阿仙奴等強隊，經常打3後衞，但並非每隊都適合，「343」最大弱點係後防邊路多空位，需要其他球員補位。因此，筆者認為「4231」陣式，比較易運用，門將加上後衞同防中，有7人負責防守，3位進攻中場及1位前鋒負責反擊，可以話係四平八穩，就算贏唔到，都唔會輸住，最適合弱隊使用。
今輪英超重頭戲，阿仙奴主場對曼聯，雖然阿仙奴近況有改善，但後防始終唔穩陣，畀唔到筆者信心，曼聯今場應該可以坐和望贏。