今晚英超尾場「宿敵大戰」，阿仙奴主場對曼聯，兩隊為免畀榜首曼城拋離，今仗不容有失。「兵工廠」近況不俗，周中快車大勝哈特斯菲爾德5比0，寫下今季聯賽主場7戰全勝佳績，但遇剋星莫連奴帶領嘅「紅魔鬼」，相信都係「一物治一物」，平手盤樂比捧2.09倍嘅曼聯！
（Now 621及LeSports周日凌晨1時30分直播）
雲格同莫連奴屬完全兩種性格嘅領隊，雲格注重過程多於結果，咁多年贏唔到聯賽冠軍都好似唔關佢事咁，最緊要踢出華麗足球，同埋球會盤數夠靚；相反「寸王」莫連奴為求目的不擇手段，最緊要贏波同攞冠軍，兩人各不相讓多次隔空開火，但計戰績就真係莫連奴威晒。
「雙巴」復出 曼聯攻守兼備
雲格喺英超同莫連奴交手13次，僅得1勝5和7負劣績，唯一一次贏波就係上季季尾，值得一提係嗰場波，咁啱喺曼聯歐霸4強兩回合之間踢，樂比仔認為曼聯當時係分心歐霸，先至畀阿仙奴乘虛而入，若兩隊真正埋牙，都係實牙實齒嘅曼聯略勝一籌。
其實兩隊賽前已有唔少小動作，盛傳曼聯對兩位即將約滿嘅阿仙奴主將奧斯爾及阿歷斯山齊士有興趣，雖然煲水成分居多，但大戰前吹呢啲「挖角風」，梗係想擾亂對方軍心，至於雲格就話莫連奴今場唔會再「泊大巴」，擺到明出口術。
論近況阿仙奴的確唔錯，近3場聯賽贏晒兼冇失波，唯一壞消息係今季入最多波嘅拿卡錫迪因傷肯定缺陣。曼聯近況亦唔弱，周中作客贏屈福特4比2，同樣聯賽3連勝。最難得係兩名十字軍保羅普巴同伊巴謙莫域均告復出，普巴踢咗幾場狀態冇問題，至於伊巴連續3場後備入替，相信亦適應番比賽節奏。曼聯係英超失波最少球隊，連進攻都齊晒腳，今場有力反客為主。