踢天才波鋒線跌Watt
周日凌晨西甲好戲連場，皇家馬德里將會作客畢爾包。今季「銀河艦隊」聯賽表現唔算超班，尤其前線進攻乏力，呢場加里夫巴利仲要繼續養傷避戰，面對聯賽主場近5仗4次開細嘅畢爾包，兩隊唔慌多波入，大細中位數3.5球，入球細有1.65倍咪錯過。
（Now 632周日凌晨3時45分直播）
過去兩輪西甲先後上演前4混戰，不過都以和局收場，冇對前列球隊排名造成影響，意味落後「1哥」巴塞隆拿8分嘅皇馬惟有繼續苦苦追分。「銀河艦隊」今季喺西甲進攻唔順嘅問題，已經多次為人詬病，搞到依家排到落聯賽第4，踢咗13輪前鋒C朗同賓施馬都只係各自得兩球進帳，呢兩位前線主力狀態低迷直接拖低皇馬嘅進攻效率，不過負責制訂戰術嘅主帥施丹亦難辭其咎。呢位法國教頭對皇馬前場進攻戰術一向不多過問，任由一班攻擊組合踢天才波，以「銀河艦隊」依家鋒力，加上加里夫巴利長期有傷病纏身，今場又再倦勤，睇嚟皇馬今場想大勝都唔容易。
畢爾包主場硬淨旺細
畢爾包今季聯賽開局麻麻，現時排名跌落倒數第5，好彩主場表現有番咁上下，早前先後擊敗西維爾同逼和維拉利爾，證明呢支歷史上未降過班嘅巴斯克球隊底蘊猶在，球隊進攻表現雖然唔算標青，不過勝在喺主場防守夠硬淨，近5仗聯賽主場4次開細，今場仲有主力後衞耶雷艾華利斯傷愈復出，對付攻力疲弱嘅一班皇馬前鋒絕對綽綽有餘，中位數3.5球入球細係不二之選。