澳職今日有場前列大戰，由「2哥」紐卡素噴射機主場迎戰「3弟」墨爾本城。上季排包尾嘅紐卡素噴射機今季畀球迷好大驚喜，尤其納博特同柏拉杜斯組成嘅進攻拍檔，鋒力相當強橫，今仗對住同樣崇尚進攻嘅墨爾本城，好大機會上演入球騷，中位數2.5球嘅入球大有1.67倍抵玩！（有線64、203台及無綫myTV Super周六下午4時50分直播）
紐卡素噴射機上季雖然排包尾，不過就打起咗進攻主力納博特，今季搵埋射術一流嘅奧當路雲同創造力強嘅柏拉杜斯，3人產生意想不到嘅化學作用，開咧8場波合共入咗15球，單係佢哋3個入球數字已經多過晒其他球隊嘅全隊入球，噴射機8場聯賽有7場總入球數達3球或以上，可謂火力全開，今仗雖有奧當路雲因傷缺陣，但亦無阻其餘兩人數胡。
墨軍「平亂」 搶攻求成績
作客嘅墨爾本城早前爆出教練團不和，主帥載斯同副帥華簡尼斯出現糾紛，結果高層決定企載斯嗰邊，宣布同華簡尼斯解約。墨爾本城今季喺王牌射手科拿路利養傷下，載斯貫徹進攻踢法，前鋒羅斯麥哥馬克交足貨已入5球，依家載斯成功踢走眼中釘獨攬大權，今仗梗係全力爭勝證明自己，預期踢法會更進取，大騷可期。