盤口露端倪
日職今日煞科，當中榜首鹿島鹿角只要作客贏磐田山葉，就可壓倒川崎前鋒稱霸日職，所以無論足智彩定外國莊家，明顯都壓低個客勝，加上磐田主場受讓例冇好下場，熱捧鹿島1.61倍客勝封王！
（有線61、201及148台周六下午1時直播）
鹿島鹿角目前領先「老二」川崎前鋒2分，但得失球差輸一截，所以今日理論上要贏磐田山葉至可以捧盃，和都唔掂，事關川崎前鋒嘅謝幕戰主場對篤定降班嘅大宮松鼠，假如鹿島和波而川崎Win咗，到時川崎就可憑得失球差反壓鹿島封王，故此鹿島今仗絕不能手軟以免「臨尾香」。
鹿島4大射手火力全開
今仗係鹿島主帥大岩剛同磐田教頭名波浩嘅「同窗對決」，兩位早年係清水商高校同學，又一齊踢過磐田，大家都清楚對方嘅戰術風格，踢起嚟會好有針對性，今場波嘅勝負前鋒質素好關鍵，鹿島有中前場韋法臣李安度、柏度祖尼亞、鈴木優磨同啱啱畀日本國家隊重召嘅金崎夢生4大射手，佢哋夾埋喺聯賽入咗36球。相反磐田太過依賴箭頭川又堅碁同中場大腦中村俊輔，容易畀人嘜死，偷雞難度高。
磐田今日更有中堅櫻內渚坐波監，除非刻意「泊大巴」，否則好難頂足90分鐘，形勢上磐田都想搶3分超越柏雷素爾攞第4，成為亞冠盃「候補球隊」，根本冇得死守求1分。從盤口睇，現時歐洲平均賠率係主3.4倍、和3.34倍、客1.98倍，類似水位結構今季磐田主場波出現過兩次，結果磐田兩場都輸0比2，主場受讓都唔慌「有So」，加上磐田喺山葉球場6戰鹿島僅得1勝2和3負，今場鹿島作客贏波封王，可謂高唱入雲。