又嚟到星期五澳職嘅時間！今日戲碼依然強勁，將會上演澳洲足總盃決賽翻版戲碼，由阿德萊德聯主場迎戰FC悉尼。兩隊喺上星期決賽激戰百二分鐘，仲要踢到加時先至分出高下，但唔好忘記，上場比賽係阿聯作客去到悉尼，今日返主場出戰，復仇味濃，「阿聯」受讓之下我一於攬下盤。
（有線64及203台周五下午4時50分直播）
近8次主場交手僅1敗
「阿聯」近期狀態唔錯，先係作客到中岸水手，佢哋全場反客為主壓住對方嚟踢，順利凱旋而歸。繼後喺足總盃決賽，同FC悉尼五五波，90分鐘打和。跟住上仗返主場，喺射門次數15對7嘅大比數之下贏埋西悉尼流浪者，證明班波真係唔差。陣容方面，除咗馬朗尼停賽之外，其他人腳都齊章，今日仲有中場雲斯利亞、後防干斯坦度普路斯復出，兵源調動充裕，加上球隊近8次主場對FC悉尼只輸過1次，今日有力頂住。
至於FC悉尼，今日後防米高蘇路同中場主力連高域要帶傷上陣，後備前鋒麥西蒙亦停賽。今季呢班波防守真係冇以往咁穩陣，8場聯賽之中有5場都失波，作客水準亦冇以往咁穩定，加上近期征戰頻密，今日作客仲要讓波，難免令人有啲擔心！