墨城水手愛對攻
墨爾本城近期頻頻開大，近3仗都開3球或以上，加上過往球隊對親中岸水手都演大騷，近6次交手全開3球或以上，呢場中位數2.5球入球大值得追捧，加上皇家蘇斯達對馬拉加，同貝迪斯對馬德里體育會2場同樣有機會開大嘅西甲大戰，3串1有4.88倍博得過。
講到墨爾本城，唔可以唔提卡希爾，呢位澳洲前鋒為咗爭取更多上陣時間，早前就同墨爾本城終止咗合約，卡希爾38歲仲咁搏，無非都係想另謀高就，為嚟緊踢世界盃決賽周做足準備，作為澳洲國家隊今屆世盃外圍賽征途至關重要嘅球員之一，卡希爾喺聯賽反而鮮有機會上陣，皆因墨爾本城前場有唔少當打球員坐穩正選位置，包括至今攻入6球嘅羅斯麥哥馬克，足見佢哋前線火力有保證。
皇蘇貝迪斯主場旺大
不過，墨城近5仗聯賽場場都有失波，上仗擊敗強敵紐卡素噴射機雖然一洗頹風，不過球隊防守疲弱嘅問題依舊，呢場主力後衞文尼梅斯卡特仲要停賽，後防唔穩都係以攻代守好過，何況墨城過往6次對中岸水手都開大，呢場中位數2.5球嘅入球大捧得過。
（無綫myTV SUPER302台周日下午4時直播）
另外兩場西甲大戰，皇家蘇斯達近5仗主場全開3球或以上，呢場面對作客表現曳爆嘅馬拉加隨時喪攻再開大。（Now 632周日晚7時直播）同樣旺大嘅仲有貝迪斯主場硬撼馬德里體育會，貝迪斯主場近8仗7次開3球或以上，面對上仗作客聯賽慨贈對手5蛋嘅馬體會，中位數2.5球再開大絕對唔出奇。
（Now 632周日晚11時15分直播）