筆者再次強調，最討厭用「應該」、「如果」呢類模稜兩可嘅字眼，因為根本係呃人。我一早已講過，歐聯已出線球隊，絕對唔可以下注，例如曼城唔會強求英超、歐聯等各項賽事，連續保持不敗，果然輸畀薩克達。事實上，領隊哥迪奧拿係好驚拿玻里，放水畀薩克達，成功踢走「眼中釘」，實行少個香爐、少隻鬼；至於巴黎聖日耳門（PSG）躋身淘汰賽，一旦再遇拜仁慕尼黑，筆者都係睇好PSG。
講番正題，筆者專攻美職多年，美職成立後，我先至回歸香港同新加坡擔任足球評述員，清楚美職成立過程並唔易，94年世界盃後，國際足協要求美國創立優秀職業聯賽，近20年時光，由當年不足10隊，到現時已有22隊，34輪聯賽，平均每場入座人數達25,000人，仲多過意甲。
今季季後賽總決賽上演上季翻版，FC多倫多主場對西雅圖海灣者，常規賽盟主FC多倫多表面上係加拿大球隊，但其實雲集不少各國猛將，上仗為球隊一箭定江山嘅美國前鋒艾迪杜里，當時堅持帶傷比賽，入波後先至被換出，非常有鬥心，就算今場要紮住上，都會有好表現。
一戰定生死變數多
西雅圖海灣者又重演上季走勢，開季頭3個月表現弱，之後愈戰愈勇，一鼓作氣連續兩季殺入總決賽，絕對唔嘢小。以常規賽成績而論，FC多倫多可睇高半線，但今場一戰定生死，佢哋上屆總決賽互射12碼失落冠軍，今仗心理負擔大。筆者認為法定時間90分鐘難分勝負，入波亦會偏少，筆者將單刀赴會，評述今場生死決戰。
（無綫myTV SUPER303周日凌晨5時直播）