今季意甲米蘭雙雄恍如天與地，國際米蘭全面復興，反觀AC米蘭愈踢愈沉，最令人費解係炒咗教練蒙迪拿後，竟然搵「莽夫」加度素領軍，佢做球員時的確令人欣賞，但教波完全唔掂，以往冇隊教得長，請佢救亡等同「放棄治療」，今日主場仲要讓博洛尼亞一球，實在太過火，捧2.05倍下盤！（無綫myTV SUPER 302周一凌晨3時45分直播）
加度素接手愈踢愈衰
加度素係出名「短命主帥」，2013年教錫永唔夠3個月就被炒，之後教巴勒莫亦都係3個月貨仔，教希臘球隊克里特OFI捱到半年。最威係率領比薩升上意乙，但就同會方不歡而散。AC今次由青年軍提升加度素執教一隊，可以話係「自殺式」決定，佢領軍首仗就被當時全敗嘅賓尼雲圖逼和，簡直係「紅黑兵團」一大恥辱，之後場歐霸又輸埋，表現比蒙迪拿執教時更曳。
博洛尼亞今季和過國米，近3場聯賽亦取得2勝1和，近況唔錯，尤其前鋒施蒙尼華迪值得留意，AC中堅阿利斯奧羅馬洛尼今場停賽，施蒙尼華迪更加有機可乘，博洛尼亞呢個下盤好路。