高普領軍3挫愛華頓
英超今晚除咗有曼市打吡，較早時間仲有一場「默西賽德郡打吡」，由「紅軍」利物浦主場火併「拖肥糖」愛華頓。利物浦領隊高普一向充滿激情，連帶球員踢打吡戰都特別醒神，自高普執教利物浦後，3次領軍對愛華頓錄得全勝，明顯係愛華頓剋星，今仗主場出擊當然值得睇好，利物浦讓2球照捧讓球主勝。
（Now 621及Le Sports周日晚10時15分直播）
利物浦前任羅渣士正正係兩年前喺「默郡打吡」被愛華頓逼和1比1而落台，造就高普登陸晏菲路；高普上任後亦冇令利物浦球迷失望，3次領軍出戰「默郡打吡」全部獲勝。菲臘比古天奴、穆罕默德沙拿、羅拔圖法明奴同沙迪奧文尼4位攻擊球員近期表現着晒火，周中歐聯包辦入波7蛋狂數莫斯科斯巴達，可以話係無堅不摧。
體能成疑大Sam冇符
另邊廂，愛華頓啱啱迎來「護級專家」艾拿戴斯上任，即輕取哈特斯菲爾德打響頭炮，不過拖肥糖喺周四深夜歐霸作客阿波羅利馬素，受舟車勞頓之苦，更比周三深夜出戰歐聯嘅「紅軍」少1日休息，對於崇尚「體力足球」嘅大Sam嚟講非常不利，作客晏菲路球場預計凶多吉少。