打吡戰寧舍落力
今日澳職將上演「悉尼打吡」，由西悉尼流浪者主場大戰FC悉尼。「西流」近期成績唔掂，但踢打吡戰寧舍落力，榜首FC悉尼今季防守強勁，中位數2.5球嘅1.77倍細盤穩陣！
（有線64及203台周六下午4時50分直播）
FC悉尼今仗唔算齊章，指揮官連高域有傷、後備中鋒麥西蒙停賽。班波近期火力一般，就算係贏都唔夠清脆，欠缺說服力，今仗能否全取3分令人懷疑。幸防線上嘅阿歷斯韋堅遜及佐迪布積斯狀態回穩，配合掃蕩力強嘅防中比爾蘭特同班頓奧尼爾，防守畀到人信心。
榜尾嘅「西流」改由甘巴爾執教後，成績未見改善，已經8場不勝，呢位金牌教頭都頭痛。佢哋上場輸畀獅吼之餘，前線蘇迪里奧同奧利奧爾尼亞拿上半場就傷出，今日蘇迪里奧仍要養傷，預計尼亞拿焗住帶傷上陣，鋒力再受影嚮。不過「西流」踢打吡戰往績唔曳，近5次只曾1敗，當中3次開細盤，加上佢哋近5場聯賽亦全細，「路紙」咁靚繼續追！