今晚歐聯分組賽煞科，其中勇達巔峰嘅「藍月亮」曼城，喺F組作客出戰烏克蘭勁旅薩克達。論牌面曼城梗係贏幾條街喇，不過筆者認為薩克達有力偷雞，何解？
首先曼城頭歐聯5場贏晒，甩開次席薩克達6分鎖定首名出線，今仗對佢哋嚟講只屬例行公事，相反，薩克達只領先第3位嘅拿玻里3分，而且同拿軍對賽成績又輸蝕，若果今仗輸波而拿玻里贏波的話，薩克達就會跌落「3哥」而無緣出線，講戰意遠勝曼城，難怪賠率方面薩克達W仲熱過「藍月亮」。
施華迪布尼避戰
最重要嘅原因，由於嚟緊嗰輪英超會上演曼徹斯特打吡，曼城要作客同市死敵曼聯，若果唔小心輸波，就由領先曼聯8分縮至5分，對爭標及士氣嘅打擊唔小，既然喺歐聯已肯定晉級，無謂喺呢類無關痛癢嘅賽事嘥力，有乜依郁傷咗啲主力咪唔抵。所以主帥哥迪奧拿將中場「雙核」大衞施華及奇雲迪布尼留喺英國，明顯為曼市打吡留力，今仗會起用新仔，實力點都差啲。
加上哥帥話佢之前執教巴塞隆拿及拜仁慕尼黑，造訪烏克蘭從未贏過波，似乎係「預告」贏唔到，今仗開出平手盤，薩克達可謂坐和望贏。