莫連奴捍衞主場有料到
今晚英超上演曼徹斯特市打吡，曼聯主場對曼城，唔理曼城狀態有幾好，莫連奴捍衞主場嘅決心真係唔講得笑，計晒各項賽事，曼聯主場已跨季40場不敗，今仗竟然有得受讓平半，真係千載難逢好機會，若驚曼聯泊大巴拎1分收工，大可玩讓球主客和1.71倍「讓球主勝」。
（Now 621及Le Sports 周一凌晨零時30分直播）
曼聯自2016年9月主場不敵曼城後，已經超過1年主場未輸過，今季打咗11場更係全勝，而且大部分賽事都係贏1球以上，贏得相當有說服力。莫連奴嘅主場威力唔係嚟到曼聯先有，由佢千禧年執教賓菲加開始，之後教利亞拿、波圖、車路士、國際米蘭到皇馬約10年期間，曾保持168場聯賽主場僅輸1場嘅超強紀錄，當中教車仔、國米喺咁激烈嘅聯賽都未逢一敗，作客要贏莫連奴真係談何容易？
普巴停賽馬迪頂住
事實上，莫連奴打強隊真係有一手，愛將艾辛就曾經講過，當遇到大賽前1星期，莫連奴就會成個星期都好嚴肅，等你感受到大戰氣氛，仲會剪晒片分析對手弱點，然後日日係咁練，況且莫連奴哲學係唔贏都唔可以輸畀你，今場受讓真係啱晒胃口。
雖然中場球星普巴今場停賽，但早前佢缺陣期間，曼聯表現亦唔錯，加上有微傷嘅尼曼查馬迪亦會披甲上陣，有佢喺中場掃蕩肯定令紅魔後防壓力大減，何況神鋒伊巴謙莫域亦會喺後備席隨時候命搏殺添。
曼城1分收貨讓波危
當然莊家都唔係蠢，開得呢個盤畀你，就知曼城幾猛料！藍月亮今季都曾經創下11場作客連勝紀錄，直至上周中歐聯對薩克達，喺收起大部分主力情況下先輸1比2令紀錄告終。曼城狀態雖弗，但聯賽畢竟領先第2位嘅曼聯8分，今場就算打和都仲有一定領先優勢，和波對曼城嚟講絕對收貨，所以作客要讓波梗係揀對家曼聯啦！