今輪意甲矚目大戰，祖雲達斯主場鬥榜首國際米蘭；今季意甲變天，6連霸嘅祖雲達斯現時僅排第3位，反觀積弱多時嘅國際米蘭經過「光頭主帥」史巴列堤改造後，已脫胎換骨，成為唯一不敗之師。國米最大優勢係毋須兼顧歐洲賽，以逸待勞，面對疲兵祖記仲有得受讓，必捧國際米蘭讓球客勝。
（myTV super302台周日凌晨3時45分直播）
今季意甲4大勢力割據，分別為國際米蘭、拿玻里、祖雲達斯、羅馬，其中國米係唯一冇份踢歐洲賽嘅球隊，可以專心爭聯賽，成績自然好，情況似上季英超車路士。國米翻生另一個主因係搵到「對的人」來執教，史巴列堤以往教羅馬同辛尼特已盡顯功架，上季意甲季尾曾率領羅馬擊敗祖記，最後僅落後4分，僅居亞軍並唔失禮。
國米嘅財力及人力都比羅馬豐厚，令史帥有足夠籌碼發揮所長，佢採用嘅4231陣式以莫路伊卡迪打單箭頭，比列鍚、簡達華出任雙翼，兩位防中係由佢親自簽入嘅馬泰斯雲仙奴及保查華利拿，可貫徹執行史帥戰術，整體合作緊密，擺脫以往各自為戰嘅弊病，15場聯賽取得12勝3和，絕對有道理。
祖記老人防線頂唔住
祖雲達斯自中堅邦路斯離隊後，「BBC」防線拆夥，防守已唔及上季穩健，現時更加係搖搖欲墜；門將保方狀態明顯下滑，佢同中堅基亞連尼、右閘列治史迪拿都因傷缺陣周中歐聯，老將巴沙利跟本唔夠體力應付90分鐘激戰，中前場亦有比真歷受肌肉疲勞問題困擾。祖記之所以出現傷疲問題，好大程度上因為意甲及歐聯雙線作戰，遇上來勢洶洶嘅國米，唔好話要贏，連想攞1分都唔易。