拉莫斯卡斯米路卡華積停賽
周六晚上演西甲大戰，皇家馬德里主場迎戰西維爾；皇馬今屆嘅衞冕之路頻頻遇到阻滯，聯賽近5仗贏得2場狂失分，表現實在欠缺說服力，加上今場有沙治奧拉莫斯、卡斯米路及丹尼爾卡華積齊齊坐波監，後防隱患無窮，面對實力強勁嘅西維爾，就算有主場之利都冇本錢讓對手兩球，西維爾讓球客勝咪走寶。
（Now 632周六晚11時15分直播）
31歲嘅沙治奧拉莫斯身經百戰，踢波經驗豐唔豐富就見仁見智，不過講到攞牌相信喺西甲冇人叻得過佢，皆因上仗呢位皇馬隊長攞咗喺西甲職業生涯第19張紅牌，成為聯賽史上領紅次數最多嘅球員，搞到今場本來可以倒戈嘅佢，都要為自己一時唔冷靜「找數」停賽。不過相比起隊長缺陣，攻擊乏力先至係皇馬現時最棘手問題，「銀河艦隊」聯賽近3仗有2場入唔到波，進攻模式單調嘅毛病，絕對值得主帥施丹重視，尤其今場仲有另外兩位防守大將卡斯米路及丹尼爾卡華積停賽，加上主力後衞華拉尼倦勤，防線天殘地缺，前場如果再冇貨交，皇馬都幾牙煙。
西維爾聯賽3連勝
西維爾作為西甲傳統勁旅，今季表現可能不及華倫西亞或馬德里體育會搶眼，不過聯賽成績絕對唔曳，現時同對手皇馬同得28分。西維爾聯賽近3仗贏晒氣勢強勁，上一次輸波，都只係作客以1比2僅負「1哥」巴塞，今場面對表現飄忽嘅皇馬，受讓兩球咁筍必捧讓球客勝。