今屆歐聯最令人失望球隊，當數C組馬德里體育會。呢支西甲勁旅過去4屆有兩次入決賽，但今屆連分組賽出線都危危乎。馬體會今場必須作客贏車路士，仲要寄望同組羅馬失分畀卡拉巴克，先可以出線，背水一戰唯有焗攻。車仔已穩奪出線權，可以放開懷抱踢風流波，預料將會大手交易，首選中位數2.5球嘅1.95倍入球大。
（有線62、202台及ICM有線流動版周三凌晨3時45分直播）
近6次對碰5次開大
馬體會分組賽開壞個頭，首4場分組賽都贏唔到，直至上輪先擊敗羅馬開齋。從好一方面睇，證明球隊未放棄，所以就算出線機會渺茫，應該都會盡力一搏。事實上馬體會自從贏羅馬之後，士氣及信心都有所提升，近兩場西甲分別大炒利雲特5比0，同2比1反勝皇家蘇斯達，前排陷入球荒嘅射手基沙文，呢兩場就有3球進帳，令馬體會攻力有所保證。
車路士近6場賽事取得5勝1和，狀態甚弗，就算今場出副選都有一定威力。唔好忘記車仔首循環就係靠後備上陣嘅巴舒亞伊補時入波以2比1擊敗馬體會。睇番雙方近6次歐洲賽交手，有5次總入球達3球或以上，其中4次更達到4球或以上，兩隊碰頭大盤值得再追。