莫耶斯揸錘一樣冇料到
今晚英超頭場上演「倫敦打吡」，排尾2嘅韋斯咸主場迎戰衞冕雄師車路士，主隊自從請咗「天才」莫耶斯執教後，成績一直冇好過；相反車路士近期喺英超愈戰愈勇，夏薩特同艾華路莫拉達都踢出身價，今仗作客有望再打落水狗，「讓球」車路士讓1球照捧上盤！
（Now 621及Le Sports周六晚8時30分直播）
韋斯咸前季曾經係「巨人殺手」，可惜今時唔同往日，現時「錘仔幫」已經跌到落尾2，面對勁旅更加毫無還擊之力，今季聯賽4次面對Big 6球隊全部輸晒，包括0比4輸畀曼聯同1比4不敵利物浦，搞到領隊比歷要執包袱，改由莫耶斯掌帥。不過，呢位蘇格蘭領隊腳頭麻麻，上任後4場聯賽1和3負，今場仲要對住「硬嘢」車仔，想開齋恐怕仲要等吓先。況且，韋斯咸門將赫特今季表現未如理想，盛傳將會讓出正選畀上仗擔正嘅阿祖安卡斯迪路，問題係邊個把關都畀唔到球迷十足信心。
作客嘅車路士經歷季初不穩後，近期已經全面回復正常，近7場聯賽拎到6勝1和不敗佳績，當中有4仗保持清白之身，而且喺歐聯亦都成功躋身16強，可以話「藍戰士」已經重返正軌，對住低一班嘅球隊往往「應贏則羸」，今仗造訪韋斯咸可以話係實食冇黐牙。
夏薩特莫拉達「雙核」攻堅勁掂
車路士領隊干地上季改用3-4-3陣式後無堅不摧，最終順利聯賽封王，早前球隊陷入低潮，干地就轉用接近3-5-2嘅新陣式，再一次收到變陣奇效，夏薩特同艾華路莫拉達組成嘅「進攻雙核」效率極高，車仔近11個聯賽入波，夏薩特同艾華路莫拉達包辦其中8個，韋斯咸條豆腐防線好難頂得住囉。