曼城猛火讓球主勝扑錘
英超榜首曼城今晚強勢再出擊，主場迎戰護級分子韋斯咸，兩隊實力同狀態都差天共地，「藍月亮」曼城今季表現勢如破竹破盡紀錄，相反韋斯咸換帥之後未見起色，反而愈輸愈甘，曼城今仗各方面都贏幾條街，大炒冇難度，「讓球主客和」曼城讓3球唔算多，直取讓球主勝。
（now 621及LeSports HK周一凌晨零時直播）
曼城今季弗到勒唔住，聯賽連盃賽21仗法定時間拎到19勝2和不敗成績，打破佢哋自己喺11/12球季創下嘅最佳開季紀錄，近6仗聯賽主場，更有4仗大勝3球或以上，火力非常驚人。奇雲迪布尼、史達寧、阿古路、加比爾捷西斯等攻擊手個個都着晒火，要入幾多球都冇問題啦！
莫耶斯教韋斯咸衰多兩錢
「錘仔幫」韋斯咸深陷降班漩渦，早前將領隊比歷炒魷都冇用，事關新帥莫耶斯一直得唔到球迷同球員認同，佢上任之後球隊表現似乎仲差咗，莫耶斯領軍3仗僅得1和2負，包括上仗慘吞愛華頓4蛋，預料無力抵擋曼城嘅銳利攻勢，再次慘敗機會好大。