歐霸盃最後1輪分組賽，可以留意J組生死戰，索爾亞主場對畢爾包。榜首奧斯達辛斯已獲出線權，索爾亞落後第2位畢爾包2分，換言之，呢支烏克蘭球隊今場必須贏波，先至可以出線，鬥心一定強。至於西甲代表畢爾包和波都可以出線，踢法應會偏向穩陣，仲要讓半一，實在太過火，揀索爾亞下盤。
（Now 632周五凌晨4時05分直播）
畢爾包9場作客未贏過
索爾亞雖然名氣比唔上同國球隊基輔戴拿模、薩克達，但今屆歐霸盃表現並唔失禮，包括主場擊敗德甲球隊哈化柏林，以及首循環作客贏畢爾包，可以話係遇強愈強，嚟到今場背水一戰，隨時再次激發索爾亞球員小宇宙。
畢爾包出名主強客弱，包括聯賽及盃賽，近9場作客未贏過，加上今場唔需要贏，都可以出線，更加唔好期望佢哋會打破作客腳軟宿命。值得一提，烏克蘭天氣已進入寒冬，近日氣溫已經降至攝氏零度以下，對於習慣溫和氣候嘅西班牙球隊嚟講，肯定係一個致命打擊，索爾亞今場可以坐和望贏。