今晚直播戲碼，哈化柏林主場迎戰法蘭克福，主隊排11，客軍暫列第9位，同處中游，不過兩軍近期表現都予人好感，教頭戴達同尼高高華亦深得會方信任，雙方都有上升空間。兩軍近期前線都有好狀態，中位數2.5球嘅大盤有2.13倍相當值博。
哈化柏林法蘭克福演入球騷
哈化柏林較早前受歐霸盃拖累，兩線作戰令成績起伏甚大，不過依家歐霸出局可以專注聯賽，近期前線全面爆發，佢哋近6場正式賽事每仗最少都入兩球，箭頭伊比斯域終於重拾佳態，近3場德甲都有斬獲，包括上輪作客科隆包辦兩個入球，佢嘅年輕拍檔戴菲沙爾基上輪亦包辦兩個助攻，加上後備席上仲有質素不俗嘅沙洛文卡勞同原口元氣可供調用，前線大把籌碼。
哈化主場踢法向來開放，今季聯賽7戰有4場開出大盤，其餘3仗亦各有兩個總入球，不過佢哋防線認真麻麻，近12場聯賽有11場失波，主力後衞施巴斯坦蘭甘負傷上陣成疑，預期今仗亦難保清白之身。
法蘭克福作客特別醒神，今季聯賽7場客戰3勝3和僅1負，係德甲作客次佳球隊，共得12分只比拜仁少1分。加上佢哋踢法絕對唔保守，近7場作客嘅正式比賽全部有波入，近4場德甲入得又失得，幾位進攻主力施巴斯坦賀拿、列比錫同馬里奧斯禾夫都弗，仲有「加納王子」奇雲保定後上支援，今晚夠料同哈化柏林駁火。