奇雲謝路美 保定兄弟內訌
講番直播賽事法蘭克福主場對拜仁慕尼黑，亦係法蘭克福中場奇雲保定同拜仁後衞謝路美保定兄弟內訌，拜仁自老帥軒歷基斯回歸後重上正軌，周中喺歐聯3比1殺敗奪冠大熱巴黎聖日耳門，成功復仇士氣正盛。而且比賽咁頻密，幾時都係兵源充裕嘅大球會着數，拜仁雖然仲有紐亞、洛賓同堤亞高艾簡達拿等傷兵，不過軒帥仍然有大把籌碼玩輪換，今仗拿菲爾、謝路美保定、查維馬天尼斯、維達爾同湯馬士梅拿都喺歐聯輪休後復任正選，至於占士洛迪古斯、列貝利同阿拉巴喺歐聯都冇踢足，何況下周中德甲快車佢哋只需要喺主場迎戰榜尾嘅科隆，根本唔使留力，今場可以全力爭勝。
法福兵源短缺難敵拜仁
至於法蘭克福，冇錯上輪東網直播睇住佢哋作客贏哈化柏林，但表現認真麻麻，好幾名主力球員，包括射手斯巴斯坦賀拿、中場長谷部誠、進攻中場加仙奴域，甚至入波功臣奇雲保定，狀態都有滑坡迹象，最慘係教練尼高高華手上兵源短缺，領袖球員美亞、中場馬哥法比安同守將贊特拿仍然養傷，今仗準備用番上輪嗰11個正選，冇得回氣體力當然輸蝕，更何況佢哋嚟緊下周二德甲快車作客漢堡，搶到分嘅機會必然比今仗高，但相隔時間只得3日，仲早踢過拜仁1日，所以今仗一旦落後，隨時會收起啲主力老兵留待下仗，變相增加拜仁大勝機會。今場讓球盤拜仁讓一球、球半，黑柴撐上盤。